Í gær fannst kvenmannslík á skotæfingasvæði hersins á Kýpur. Skammt frá, í vatnsfylltri gryfju, fundust tvær konur frá Filippseyjum myrtar skömmu áður. Sex ára dóttir annarrar hvarf með móður sinni og hefur ekki fundist og er talið að hún hafi verið myrt.

35 ára hermaður hefur verið handtekinn vegna málanna og hefur hann viðurkennt að hafa myrt sjö konur.

Ein kvennanna sem fundust nú í vikunni hvarf í desember 2017, ein í maí á síðasta ári og ein í ágúst.

Kýpverska fréttastofan CNA segir að maðurinn hafi viðurkennt að hafa myrt eina asíska konu til viðbótar auk rúmenskrar konu og dóttur hennar. Samkvæmt heimildum innan lögreglunnar komst maðurinn í samband við konurnar í gegnum stefnumótasíður.

Fjölmiðlar á Kýpur segja að maðurinn sé fyrsti kýpverski raðmorðinginn. Lögreglan á eyjunni hefur beðið bresku lögregluna um aðstoð við rannsókn málsins þar sem hún hafi litla reynslu í að takast á við mál þar sem fórnarlömbin eru mörg.