Þekktur bandarískur ljósmyndari, Robert Koester, hefur verið ákærður fyrir kynferðisbrot gegn þremur konum og einni ungri stúlku. Ákæran er í 32 liðum. Hann er meðal annars ákærður fyrir nauðgun og sódómsku. Hann er sakaður um að hafa gefið fyrirsætum deyfilyf áður en hann nauðgaði þeim.

Koester starfaði í Oregon. Saksóknarar segja málið umfangsmikið og að líklega eigi fleiri fórnarlömb eftir að stíga fram. Einnig hefur verið gefin út ákæra á hendur honum í Kaliforníu fyrir 20 kynferðisbrot gegn fjórum konum í ríkinu í nóvember. Það voru þessi brot sem komu lögreglunni á sporið.

Alríkislögreglan FBI segir að Koester hafi hugsanlega stundað afbrot sem þessi frá 1994 og þar til í nóvember á síðasta ári. Borin hafa verið kennsl á fórnarlömb hans um allt land.

Koester er sagður hafa lokkað fyrirsætur úr öðrum ríkjum til sín í Oregon þar sem hann gaf þeim deyfilyf og nauðgaði. Lögreglan fann mikið af myndefni á heimili hans og er enn að skoða það og reyna að bera kennsl á fórnarlömbin.

Koester hefur starfað sem ljósmyndari síðan í byrjun tíunda áratugarins og notuðu margar þekktar umboðsskrifstofur þjónustu hans.