Svona hljóðar tíst frá Donald Trump á Twitter frá því í gær þar sem hann kennir okkur Íslendingum um hið mikla kuldakast sem hefur herjað á stóran hluta Bandaríkjanna í þessari viku. Fjölmargir Íslendignar hafa deilt þessari færslu og frétt af skrifum Trump á samfélagsmiðlum undanfarnar klukkustundir og kannski hugsa sumir honum þegjandi þörfina fyrir vitleysu sem þessa. En það er ekki allt sem sýnist í þessu.
Hér er einfaldlega um falsfrétt að ræða eða kannski mætti öllu heldur flokka þetta sem grín en þetta var upphaflega sett fram á vefsíðunni patheos.com. Þar er bent á að Trump, sem skrifaði þetta ekki, hafi rétt fyrir sér um að það séu miklir kuldar í Bandaríkjunum en þeir hafa orðið að minnsta kosti átta manns að bana til þessa.
Á vef patheos.com er ekki látið við það sitja að „hafa þessi skrif“ eftir Trump heldur er einnig fjallað um viðbrögð demókrata. Þeir eru sagðir sammála um að Ísland eigi engan hlut að máli hvað varðar kuldakastið en hafi samt sem áður ekki komist að samkomulagi um hvernig á að svara þessu tísti Trump. Sumir þingmenn demókrata eru sagðir vilja hunsa þessi skrif hans með öllu því það sé ekki gott að svara heimsku því þá breiðist hún enn frekar út.
