Sky skýrir frá þessu og segir að Ashraf Ghani, forseti Afganistan, hafi fullvissað landsmenn um að réttindi þeirra verði ekki fyrir borð borin í hugsanlegum friðarsamningi við Talibana. Liðsmenn Talibana hafa verið iðnir við árásir á afganska hermenn undanfarið og hafa þær verið nær daglegt brauð.
Zalmay Khalilzad, sendifulltrúi Bandaríkjanna, segir að drög að samningi, „sem á enn eftir að útfæra nánar“ innihaldi ákvæði um að Talibanar ábyrgist að Afganistan verði ekki notað „sem miðstöð erlendra hryðjuverkamanna eða einstaklinga“. Hann segir einnig að ef samningar nást geti það orðið til að Bandaríkin kalli allar hersveitir sínar frá Afganistan ef vopnahlé kemst á og Talibanar hefja beinar viðræður við afgönsk stjórnvöld. Hann leggur þó áherslu á að margt sé enn ófrágengið áður en hægt verði að segja að samningar hafi náðst en hann telji óhætt að segja að þetta sé í fyrsta sinn sem góður árangur hefur náðst.
Ashraf Ghani hefur hvatt Talibana til að setjast að samningaborðinu með ríkisstjórn hans og „fylgja þannig kalli þjóðarinnar“ og hefja „alvöru viðræður“. Talibanar hafa fram að þessu neitað að ræða við Ghani og stjórn hans og segja hana ekkert annað en leppstjórn Bandaríkjanna.
Rúmlega 3.400 liðsmenn herafla Bandamanna hafa látist í átökunum í Afganistan frá 2001, þar af rúmlega 2.400 Bandaríkjamenn. Talið er að um 45.000 afganskir her- og lögreglumenn hafi látist á sama tíma.
Um 14.000 bandarískir hermenn eru nú í landinu en þeir eru hluti af her NATO þar en meginmarkmið hans er að þjálfa og aðstoða afganska herinn.
Talibanar réðu lögum og lofum í Afganistan frá 1996 til 2001 en þá réðst herlið Bandamanna, undir forystu Bandaríkjanna, inn í landið í kjölfar hryðjuverkaárásanna á Bandaríkin. Talibanar hafa nú um helming landsins á sínu valdi.
