Margir demókratar hafa stigið fram á undanförnum vikum og lýst yfir hugmyndum sínum um framboð og þess er vænst að fleiri muni stíga fram á næstunni og bjóði sig fram í forvali demókrata. Jeff Zeleny, stjórnmálaskýrandi hjá CNN, segir að Clinton hafi sagt vinum sínum að hún útiloki ekki að bjóða sig fram á nýjan leik. Hann segir að þetta hafi hún sagt við þrjár manneskjur hið minnsta í síðustu viku og að það virðist hafa ýtt undir þessar hugleiðingar hennar að Roger Stone, fyrrum ráðgjafi Trump, var handtekinn í síðustu viku. Zeleny segir þó að það muni koma honum á óvart ef Clinton býður sig fram.
Howard Schultz, sem var áður einn af æðstu mönnum Starbucks kaffihúsakeðjunnar, íhugar einnig að bjóða sig fram. Í fréttaskýringaþættinum 60 mínútum sagðist hann vera að íhuga að bjóða sig fram sem óháður frambjóðandi, sem sagt hvorki fyrir demókrata né repúblikana. Hann sagði að hvorugum flokknum tækist að takast á við vandamál þjóðarinnar og að Trump væri óhæfur til að gegna embætti forseta.
Margir demókratar eru lítt hrifnir af framboðshugleiðingum Schultz og telja að hann geti stuðlað að endurkjöri Trump með framboði því hann muni sækja atkvæði til demókrata og þeirra sem hallast frekar að demókrötum en repúblikönum.
