Þetta er meðal þess sem er hægt að kaupa í netversluninni The Girl Shop. En ekki er allt sem sýnist varðandi þessa netverslun. Hún var sett á laggirnar nýlega og verður væntanlega ekki starfrækt lengi. Tilurð hennar tengist árlegri landssöfnun í Danmörku, Danmarks Indsamling, til handa bágstöddum sem fer fram 2. febrúar næstkomandi.
Þema söfnunarinnar í ár er ungar stúlkur sem eru þolendur kynlífsþrælkunar, eru þrælar, látnar gegna hermennsku, eignast börn á meðan þær eru sjálfar á barnsaldri og eru því mæður nær allt lífið. Auglýsingunum er ætlað að vekja athygli á bágri stöðu þeirra milljóna stúlkna sem búa við aðstæður sem þessar. Auglýsingarnar eða herferðin fer að mestu fram á samfélagsmiðlum og hefur vakið mikla athygli.
Á Facebook skrifar The Girl Shop meðal annars:
„Þegar fátækt og flótti eru staðreynd eru börn oft fyrstu fórnarlömbin. Að þessu sinni beinum við sjónum okkar að þessum sérstaklega viðkvæma hópi. Þær þurfa oft að þola ofbeldi, verða barnshafandi á barnsaldri og eru þvingaðar í hjónabönd og hafa takmörkuð tækifæri til að mennta sig.“
Á heimasíðunni The Girl Shop er hægt að skoða vörur sem tengjast þessu en rétt er að taka fram að vörurnar eru ekki til í alvörunni.
Viðtökurnar við þessari herferð hafa verið blendnar en margir virðast hafa misskilið hana og telja að um alvöru sé að ræða.
„Fjandinn sjálfur, . . . . hræðileg auglýsing !! Barnabrúður, vændi, flóttamenn . . . . er þetta markmiðið fyrir metnað stúlkna?“
Skrifar einn Facebooknotandi um þær. Öðrum finnst þær hins vegar góðar og veki athygli á málstaðnum.
