Tveir karlmenn hafa verið dæmdir í 18 ára fangelsi fyrir morðið á Ólympíuverðlaunahafanum Denis Ten. Denis var drepinn í heimaborg sinni, Almaty í Kasakstan, í fyrrasumar.
Denis, sem var 25 ára, var um tíma einn fremsti íþróttamaður þjóðar sinnar og hlaut hann bronsverðlaun í listskautum á Ólympíuleikunum í Sochi í Rússlandi árið 2014. Þá vann hann einnig til bronsverðlauna á heimsmeistaramótinu 2015.
Mennirnir hugðust ræna Denis í Almaty í júlí í fyrrasumar og hafa á brott með sér bílspegla af bifreið hans. Þegar hann freistaði þess að stöðva mennina var hann stunginn. Hann lést af sárum sínum á sjúkrahúsi nokkru síðar. Þriðji maðurinn var einnig ákærður í málinu og hlaut hann fjögurra ára fangelsisdóm.
