Það heyrðist síðast frá Anne-Elisabeth Hagen klukkan 09.14 þann 31. október á síðasta ári. Þá talaði hún í síma við fjölskyldumeðlim. Eftir það hefur hvorki heyrst til hennar né spurst. Norska lögreglan skýrði frá þessu í morgun en eins og fram hefur komið var Anne rænt frá heimili sínu í Lørenskog austan við Osló. Níu milljóna evra hefur verið krafist í lausnargjald fyrir hana og á að greiða lausnargjaldið í rafmynt.

Samkvæmt því sem lögreglan skýrði frá í morgun var Anne rænt einhverntíma frá 09.15 til 13.30 en þá kom eiginmaður hennar, milljarðamæringurinn Tom Hagen, heim. Hann fór til vinnu um klukkan níu og kom heim um klukkan 13.30 sagði Tommy Brøske, sem stýrir rannsókninni, í morgun. Um hálfri klukkustund eftir heimkomuna tilkynnti Tom Hagen lögreglunni um málið. Brøske sagði að vettvangsrannsókn lögreglunnar á heimili Hagen-hjónanna væri nú lokið.

Mannræningjarnir skildu eftir skrifleg skilaboð í húsinu þar sem lausnargjalds er krafist og hótað að drepa hana ef lögreglunni væri blandað í málið. Skilaboðin voru á bjagaðri norsku og hafa málfræðingar aðstoðað lögregluna við rannsóknina í þeirri von að málfarið komi upp um mannræningjana.

Í morgun höfðu lögreglunni borist rúmlega 800 vísbendingar í málinu og snúast þær um nafngreinda aðila, ökutæki, hugsanlega staði þar sem Anne er haldið fanginni og annað sem hefur vakið athygli fólks að sögn Brøske. Sumar ábendinganna varða beint þá tvo aðila sem sjást á upptökum úr eftirlitsmyndavélum við vinnustað Tom Hagen þennan örlagaríka dag í október.