Þann 4. nóvember 2016 var Louise Borglit, 32 ára, stungin til bana í Elverparken í Herlev í Kaupmannahöfn. Hún var gengin sjö mánuði með barn sitt þegar hún var myrt. Morðið er óupplýst og hefur legið þungt á dönsku þjóðinni eins og morðið á Emilie Meng sem var myrt í júlí 2016. Lögreglan hefur lagt mikla vinnu í bæði málin og í gær voru átta sérþjálfaðir lögregluhundar við leit í Elverparken.

Lögreglan í Kaupmannahöfn setti í haust á laggirnar sérstakan rannsóknarhóp til að fara yfir morðið á Louise en í honum eru reyndir lögreglumenn og ýmsir sérfræðingar. Enginn þeirra hefur áður komið að rannsókn málsins. Markmiðið var að fá „ný“ augu til að skoða málið í þeirri von að eitthvað fyndist sem gæti orðið til að málið leysist.

Einn liðurinn í vinnu þessa hóps var að í gær leituðu 8 lögregluhundar að vísbendingum í Elverparken. Það var mat sérfræðinga að þrátt fyrir að svo langt væri liðið frá morðinu gætu hundarnir enn fundið vísbendingar og slóð eftir morðingjann ef hann hefði skilið eitthvað eftir sig.

Hér er hægt að lesa umfjöllun DV frá í haust um málið.