Rottur er bráðsnjallar skepnur sem geta aðlagast nánast hvaða aðstæðum sem er. Þetta segir Andre Pittman, meindýraeyðir í Washington D.C., höfuðborg Bandaríkjanna, en óhætt er að segja að þeir hafi í nógu að snúast þessa dagana.
Sannkölluð rottuplága er nú í höfuðborginni og er það einkum hlýju veðri, samhliða fólksfjölgun, um að kenna. Aldrei hafa þeir sem starfa við meindýravarnir í borginni sinnt fleiri útköllum.
Andre Pittman og Gregory Cornes starfa báðir hjá meindýravörnum borgarinnar og þurfa þeir að grípa til ýmissa ráða til að hafa betur gegn rottunum. Auk hefðbundinna aðgerða nota þeir þurrís sem þeir koma fyrir í holum þar sem grunur leikur á að rottur haldi sig. Þá hafa nokkur útköll verið í nágrenni við Hvíta húsið.
„Rottur geta aðlagast öllum aðstæðum. Þær eru eiginlega algjörir snillingar,“ segir Pittman.
Nú er svo komið að Washington D.C. er í fjórða sæti í Bandaríkjunum yfir þær borgir þar sem flestar rottur eru. Eru þessar tölur byggðar á nýjum útköllum á hverju ári. Chicago er í fyrsta sæti á þessum vafasama lista og þar á eftir koma Los Angeles og New York.
Geralrd Brown, yfirmaður meindýravarna borgarinnar, segir að mildir vetur hafi gert rottunum kleift að fjölga sér hratt. Þá segir hann að fjöldi veitingastaða, bara og kaffihúsa hafi aukist um fjórðung á aðeins tveimur árum. „Fleira fólk með meiri pening þýðir fleiri veitingahús. Það þýðir aftur meira rusl sem enn og aftur þýðir meira fæði fyrir rotturnar.“