Karlmaður, 25 ára, var skotinn til bana í Segeltorp í Huddinge, sem er sunnan við Stokkhólm, seint í gærkvöldi. Lögreglunni barst tilkynning um skothvelli klukkan 22.44. Þegar lögreglumenn komu á vettvang fundu þeir manninn illa særðan. Hann var fluttur á sjúkrahús og var þá með meðvitund og gat rætt við lögreglu- og sjúkraflutningsmenn. Hann lést síðan á sjúkrahúsinu.

Sérfræðingar lögreglunnar hafa unnið að vettvangsrannsókn í alla nótt. Vitni segir að gerandinn hafi flúið frá vettvangi á skellinöðru. Lögreglan hefur rætt við íbúa á svæðinu í nótt og aflað sér myndefnis úr eftirlitsmyndavélum. Enginn hefur verið handtekinn vegna málsins.