Gæði sæðis karla minnkar um tvö prósent á ári samkvæmt niðurstöðum nýrrar rannsóknar. Hún er byggð á rannsóknum á sæði 124.000 karla sem hafa leitað til frjósemislækna í Evrópu og Bandaríkjunum. Sérfræðingar segja að þetta sé afleiðing af ýmsum efnum sem tilheyra lífi nútímafólks.

Önnur rannsókn, þar sem sæði 2.600 sæðisgjafa (karla með frjósemi yfir meðallagi) var rannsakað, sýndi svipaða niðurstöðu. Flestir karlar geta getið barn en vísindamenn segja að ef þessi þróun heldur áfram muni mannkynið á endanum standa frammi fyrir því að deyja út. Mirror skýrir frá þessu. Fram kemur að í rannsókn sem var gerð á síðasta ári á gæðum sæðis karla frá 1973 til 2011 hafi komið í ljós að gæðin hafi dregist saman um 59 prósent á þessum tíma og þar með verður erfiðara fyrir þá að geta börn.

Skordýraeitur, hormónatruflandi efni, stress, reykingar og offita eru meðal þeirra þátta sem eru taldir koma við sögu í þessu en einnig eru áfengi, koffín og unnar kjötvörur nefndar til sögunnar.