Það má ekki setja hvað sem er í uppþvottavélina, bæði til að vernda uppþvottavélina og einnig til að vernda umrædda hluti. Það er lítið vit í að eyðileggja þá og vélina og því betra að þvo þá bara upp á gamla mátann með uppþvottalegi og uppþvottabursta.

Ekki á að setja hluti úr áli í uppþvottavélar. Þar má nefna hvítlaukspressur, sigti, síur og eggjaskera. Ál er mjúkur málmur og yfirborð þess leysist upp ef það er sett í uppþvottavél þar sem viðeigandi þvottaefni eru notuð. Það sem losnar af álinu getur síðan sest á fleti í uppþvottavélinni og smitast yfir á annan málm og postulín.

Hnífapör úr lélegu ryðfríu stáli á ekki að setja í uppþvottavél en öðru máli gegnir ef þau eru úr góðu ryðfríu stáli, þá þola þau vel að fara í uppþvottavélina.

Potta og pönnur úr kopar, steypujárni eða með „auðveldu“ yfirborði á ekki að setja í uppþvottavélar því þvottaefnin hafa slæm áhrif og dregið úr gæðunum.

Postulín án yfirborðslags á ekki að setja í uppþvottavél. Ef málað eða gyllt postulín, sem er ekki með yfirborðslag til varnar, er sett í uppþvottavél geta litirnir breyst og gljáinn farið af.

Fín glös á ekki að setja í uppþvottavél. Þetta á til dæmis við um kristalsglös og fín handgerð glös. Þegar þau komast í snertingu við vatn, hita og þvottaefnin leysist yfirborðið upp og verður matt. Ekki er hægt að lagfæra þetta.

Ekki á að setja hluti úr tré í uppþvottavél. Þeir geta drukkið vatn í sig og hugsanlega rifnað þegar þeir þorna.

Plasthlutir sem ekki þola meiri hita en 85 gráður á ekki að setja í uppþvottavél. Þeir geta aflagast vegna hitans. Lesið því vel merkingar á plasthlutum ef til stendur að setja þá í uppþvottavél.