Tveir þingmenn repúblikana krefjast þess nú að atkvæðagreiðslu í öldungadeild Bandaríkjaþings um útnefningu Brett Kavanaugh í embætti hæstaréttardómara verði frestað. Þeir vilja að atkvæðagreiðslunni verði frestað þar til Christine Ford, sem bar Kavanaugh þungum sökum í viðtali við The Washington Post í gær, hefur borið vitni fyrir dómsmálanefnd öldungadeildarinnar.

Ford, sem er prófessor í sálfræði við háskóla í Kaliforníu, sagði í viðtalinu að hún hafi verið í sama menntaskóla og Kavanaugh þegar hann beitti hana ofbeldi. Þetta segir hún að hafa gerst í samkvæmi þegar hún var 15 ára en hann 17. Hún sagði að hann hafi haldið henni fastri niður í rúm og reynt að afklæða hana og hafi haldið fyrir munn hennar þegar hún reyndi að öskra.

„Ég óttaðist að hann gæti drepið mig. Hann reyndi að yfirbuga mig og afklæða mig.“

Sagði hún í samtali við blaðið.

Þingmenn demókrata voru ekki lengi að taka við sér og kröfðust frestunar á atkvæðagreiðslunni um útnefningu Kavanaugh. Demókratar eru á móti útnefningu Kavanaugh en repúblikanar eru í meirihluta í öldungadeildinni, hafa 51 þingmann á móti 49 þingmönnum demókrata.

Samkvæmt áætlun á að greiða atkvæði um útnefningu Kavanaugh á fimmtudaginn og síðan á öldungadeildin að fara í frí. En þetta gæti allt verið í uppnámi því Jeff Flake og Bob Corker, sem eru að láta af þingmennsku fyrir repúblikanaflokkinn, hafa nú tekið undir með demókrötum og krefjast frestunar á atkvæðagreiðslunni. Þar með er meirihluti fyrir frestun atkvæðagreiðslunnar.

The Washington Post hefur eftir Flake að hann telji að ekki eigi að greiða atkvæði um útnefninguna fyrr en Ford hefur komið fyrir dómsmálanefndina og málið hefur verið rannsakað betur. Hann situr sjálfur í dómsmálanefndinni og er einn mesti gagnrýnandinn innan repúblikanaflokksins á Donald Trump.