Á miðvikudaginn fundust þrjú mannslík fyrir neðan hina heimsfrægu bresku kalksteinskletta Beachy Head í East Sussex. Fyrst fannst lík 58 ára karlmanns frá Lundúnum. Þegar björgunarmenn voru að fjarlægja lík hans fundu þeir lík af konu og var strax ljóst að það hafði legið þarna lengi. 40 mínútum síðar fundu björgunarmenn síðan þriðja líkið.

Breskir fjölmiðlar skýra frá þessu, þar á meðal The Telegraph. Breskir fjölmiðlar sögðu í fyrstu að lögreglan væri að leita að fjórða líkinu fyrir neðan klettana. Lögreglan vísaði þessum fregnum síðar á bug.

Lögreglan hefur ekki enn viljað tjá sig um hvort fólkið hafi hrapað af slysförum eða framið sjálfsvíg með því að stökkva fram af klettunum. Á þessu stigi bendir ekkert til að fólkinu hafi verið hrint fram af klettabrúninni eða að tengsl séu á milli þeirra en lögreglan vinnur að rannsókn málanna.

Um 350.000 ferðamenn heimsækja þessa fallegu kalksteinskletta árlega. Íbúar á svæðinu hafa á undanförnum árum reynt að vekja athygli yfirvalda á hættunni sem getur leynst á svæðinu en stór stykki hafa brotnað úr klettunum.

Beachy Head er 152 metrar á hæð og eru hæstu kalksteinsklettarnir á Bretlandseyjum.