Samsæriskenningasmiður sem telur að bandarísk yfirvöld hafi ráðið tónlistarmanninn Kurt Cobain af dögum fær ekki aðgang að myndum sem lögregla tók eftir andlát hans.
Kurt Cobain, sem gerði garðinn frægan með hljómsveitinni Nirvana, svipti sig lífi í apríl árið 1994. Cobain, sem var 27 ára, notaði skotvopn.
Maðurinn sem vildi aðgang að myndunum heitir Richard Lee og leitaði hann til dómstóla um að myndirnar yrðu gerðar opinberar. Dómari hafnaði hins vegar beiðni hans og sagði að það væri hreinlega ólöglegt að gera þær opinberar.
Aðstandendur Cobain, ekkjan Courtney Love og dóttirin Frances Bean Cobain, lögðust hart gegn því að myndirnar yrðu gerðar opinberar.
Að því er USA Today greinir frá er markmið Lee að sanna það að Cobain hafi ekki framið sjálfsvíg heldur verið myrtur. Hvað hann hefur fyrir sér í því liggur ekki alveg ljóst fyrir.