Bresk yfirvöld vilja vopna fleiri lögreglumenn en tíðkast hefur fram að þessu. Meðal hugmynda eru uppi er að vopna fleiri lögreglumenn á afskekktum svæðum þar sem löng bið er eftir vopnuðum sérsveitarmönnum. Einnig er rætt um að auðvelda aðgengi lögreglumanna að skotvopnum. Þessar fyrirætlanir eru tilkomnar vegna hryðjuverkaógnar en einnig til að gera lögreglumenn betur í stakk búna til að bregðast við stórum atburðum um allt land.

Vopnuðum lögreglumönnum hefur verið fjölgað á undanförnum árum en enn vantar um 100 lögreglumenn sérþjálfaða í baráttu gegn hryðjuverkum. The Independent skýrir frá þessu. Fram kemur að lögreglustjórar segi að verið sé að íhuga þessar róttæku breytingar á vopnaburði breskra lögreglumanna til að hægt sé að bregðast nægilega fljótt við á svæðum þar sem löng bið er eftir sérsveitum lögreglunnar.

Haft er eftir yfirmanni þeirrar deildar breska ríkislögreglustjórans sem fer með stjórn vopnaðra lögreglumanna að umræða um þetta fari nú fram. Hann sagðist þess fullviss að viðbragðstími vopnaðrar lögreglu í Lundúnum, Birmingham, Manchester og öðrum stórum borgum sé góður en þegar komið sé út í dreifðari byggðir sé staðan önnur og biðin eftir aðstoð sé mun lengri.

Nú eru um 6.500 breskir lögreglumenn vopnaðir en voru aðeins 874 fyrir tveimur árum.  Auk þeirra eru 3.300 vopnaðir lögreglumenn til viðbótar hjá the British Transport Police, Civil Nuclear Constalbulary og Ministry of Defence Police. Þessa lögreglumenn er hægt að senda á vettvang þegar stórir atburðir krefjast fleiri vopnaðra lögreglumanna.