Hver vill ekki slá í gegn með góðri máltíð sem tekur bara 15 mínútur að framreiða og tryllir bragðlaukana? Hér er Hildur Rut Ingmarsdóttir matarbloggari á Trendnet með hugmynd af Tacos skálum sem steinliggja og sáraeinfalt er að útbúa.

„Einn af mínum uppáhalds hversdagsréttum sem klikkar aldrei! Tekur 15 mínútur að elda og krakkarnir elska þetta. Ég set oftast kínóa eða baunir í réttinn sem mér finnst svo frábært. Djúsí og krönsí grænmetisréttur sem ég mæli með að þið prófið,“ segir Hildur Rut.

Tacos skálar

Mæli með þremur tacos skálum á mann

10 stökkar tacos skálar

ólífuolía

1 pkn tilbúið kínóa frá Quinola (mér finnst mexíkóskt eða bragðlaust best)

1 krukka salsasósa

Krydd

Laukduft, hvítlauksduft, cumin, salt og pipar eftir smekk

Rifinn cheddar ostur

Toppurinn

Habanero sýrður rjómi (eða venjulegur)

Ostasósa

Smátt skorin gúrka, eftir smekk

Smátt skorinn tómatur, eftir smekk

1-2 avókadó, stappað með salti, pipar og lime safa

Limebátar

Steikið kínóa upp úr ólífuolíu og kryddið eftir smekk. Blandið salsa sósunni saman við. Dreifið tacos skálunum á bökunarplötu og fyllið þær með kínóa blöndunni og rifnum osti. Bakið í ofni við 190°C í um það bil 10 mínútur eða þar til osturinn er bráðnaður. Toppið með sýrðum rjóma, ostasósu, gúrku, tómötum, avókadó og kreistið lime safa yfir. Njótið vel.