Þátturinn Matur & heimili er á dagskrá Hringbrautar í kvöld kl. 19 og aftur kl. 21, en hann er í umsjón Sjafnar Þórðar.
Í kvöld verða sælkerakræsingar í forgrunni í þættinum. Sjöfn heimsækir Evu Dögg Sigurgeirsdóttur og syni hennar tvo, Bjarna Gabríel og Viktor Áka, sem ætla að baka eldbakaðar, syndsamlega góðar pítsur en fjölskyldan reynir að vera með pítsakvöld einu sinni í viku.
„Við fjölskyldan höfum ávallt búið okkur til tíma til að elda saman og að baka pítsur með strákunum er eitt það skemmtilegasta sem ég geri eftir að við fengum þennan snilldar Bertello pítsaofn. Það er svo ljúffengt að fá eldbakaðar pítsur sem tekur einungis um eina til þrjár mínútur að baka,“ segir Eva Dögg sem er orðin eldklár með pítsaspaðann við hönd.
Síðan heimsækir Sjöfn mæðgurnar, Elínu Heiðu Hermannsdóttur og Berglindi Hreiðarsdóttur köku- og matarbloggara með meiru, heim í eldhúsið. Elín Heiða er væntanlega yngsti matreiðslu- bókaútgefandi landsins og ætlar að töfra fram ljúffengar kræsingar upp úr bókinni fyrir Sjöfn. Þar á meðal er skyrkaka sem Elín segir vera sína eftirlætis. „Þetta er ein uppáhalds kakan mín og ég var ekki lengi að ákveða að hún færi í þessa bók,“ segir Elín Heiða og er hin stoltasta með matreiðslubókina sína. „Það var virkilega gaman að vinna að þessu verkefni með Elínu Heiðu og við mæðgurnar tókum sumarið í þetta,“ segir Berglind og er hin ánægðasta yfir að dóttirin deili með henni áhuganum á bakstri.
Hér fyrir neðan má sjá stiklu úr þættinum: