Hér kemur uppskrift af einum uppáhalds morgunverði líkamsræktarfrumkvöðulsins Ágústu Johnson framkvæmdastjóra Hreyfingar. „Ég nota þetta múslí út á lágkolvetna chiagrautinn minn, einstaklega góður og hollur morgunverður sem ég mæli með að þú prófir,“ skrifar Ágústa í pósti til meðlima Hreyfingar í dag.

Hreyfing sendir gestum sínum reglulega uppskriftir en þessi ku vera að slá í gegn hjá súru leikfimisunnendum sem æfa nú heima eða skríða á klakabúntum miðborgarinnar. En góður morgunverður og heimaæfing er svo sannarlega skref í rétta átt.

Chia grautur

3/4 b. chiafræ
3 b. möndlumjólk
Stevia – ca 15 dropar eða eftir smekk
2 tsk vanilludropar

Blandið vel saman í stóra krukku með loki og geymið í kæliskáp yfir nótt.

Lágkolvetna múslí

Hitið ofninn í 160 C°

90 g pekanhnetur – saxaðar
90 g góðar möndlur – saxaðar (ég nota Olio Nitti hvítar, saltaðar sem eru geggjaðar)
50 g graskersfræ
40 g kókosflögur
40 g brasilíuhnetur – saxaðar
3 tsk kanill (ég elska kanil, má vera minna eftir smekk)
1/2 tsk sjávarsalt (má etv sleppa ef notaðar Olio Nitti möndlur)
70 ml kókosolía
1 msk möndlumjöl
1 msk Good good Sweet like syrup
1 tsk vanilla (set gjarnan aðeins rúmlega)
1 eggjahvíta – stífþeytt

Blandið fyrst þurrefnum saman í sér skál, bætið svo olíu, vanillu, sírópi út í þeyttu eggjahvítuna.

Blandið svo öllu vel og vandlega saman.

Dreifið vel úr á bökunarpappír og bakið í u.þ.b. 25 mín.