„Þetta er allt á frumstigi ennþá en þegar mér bauðst að taka þessu verkefni skoraðist ég ekkert undan því,“segir Helgi í viðtalinu við Fréttablaðið. Hann ætlar, ásamt Guðfinni Karlssyni veitingamanni, að koma veitingarýminu í Hótel Borg aftur á toppinn. „Við viljum koma Gyllta salnum aftur í notkun þar sem vonandi verður hægt að dansa, eins og sagan ber með sér,“ segir hann. „Það er algjör synd að einn fallegasti salur Reykjavíkur hafi bara verið settur undir pítsuofn. Mér hugnast það engan veginn.“
Helgi er enginn grænjaxl í veitingabransanum. Hann hannaði og stofnaði veitingastaðinn Astró á sínum tíma auk þess sem hann hefur verið í veitingarekstri í Berlín í Þýskalandi. Hann bjó ásamt fjölskyldu sinni í Ítalíu skömmu fyrir aldamót og er eldamennskan heima hjá honum því oft ítölsk. „Einn uppáhaldsrétturinn minn er „vitello a la milanese“ eða kálfasnitsel að hættiMílanóbúa. Maður lærði auðvitað heilmikið þarna úti.“
Þrátt fyrir að vera hrifinn af ítalskri matargerð er Helgi ekki tilbúinn að gefa það upp hvort eldamennskan á Borginni verði í þeim stíl. Hann lofar því þó að vandað verði til verka á staðnum. „Það eru ekki margir staðir á Íslandi sem eru jafn „grand“ og „classy“ og Borgin.“
