Leikkonan Alicia Silverstone segist aldrei þurfa að skamma níu ára son sinn, Bear Blu Jarecki, og þakkar vegan-mataræðinu fyrir góða hegðun hans.

„Hann er svo orkumikill og ég hlæ oft og hugsa: „Ohh greyið vegan barnið mitt, hann er svo máttlaus“, því að hann er hoppandi út um allt og svo villtur,“ sagði Alicia á netviðburði SHE Media þann 20. maí síðastliðinn. Daily Mail greinir frá.

„En það er einhver ró innra með honum. Ég þarf ekki að öskra á hann eða skamma hann. Eina sem ég þarf að gera er að segja: „ó Bear, Nei takk“ og hann segir: „Ókei mamma.“ Við getum bara talað þannig því hann er ekki í klikkuðu skapi.“

Alicia hélt áfram og sagði: „Krakkar hegða sér illa þegar þeir borða óhollan mat. Þá líður þeim illa og hegða sér í samræmi við það. Alveg eins og við gerum. Það er gott fyrir alla að borða hollt. Þannig eigum við góð og heilbrigð samskipti og þar að auki höldum við hjartasjúkdómum, krabbameini, sykursýki og öllu þessum sjúkdómum í skefjum, sérstaklega á tímum kórónuveirunnar.“

Alicia hefur áður haldið því fram að hún hafi glímt við ýmis veikindi og kvilla, eins og astma og ofnæmi, áður en hún varð vegan. En hún segir að matarræðið hafi „læknað“ það allt. Hún segir matarræðið sömuleiðis halda burtu bólum og aukakílóum.