Má bjóða þér lúsmís, aspasís eða kampavínsís? Þú getur smakkað á hinum árlega Ísdegi Kjöríss, sem verður haldinn við verksmiðju fyrirtækisins í Hveragerði á laugardaginn milli kl. 13-16.
Dagurinn er haldinn í samstarfi við bæjarhátíðina Blómstrandi daga og því geta gestir einnig notið annarar dagskrár sem er í boði í bænum. Mörg þúsund manns hafa mætt á hátíðina undanfarin ár sem nú verður haldin í 13. skipti, en mjög vinsælt hefur verið meðal höfuðborgarbúa, að bregða sér í ísbíltúr til Hveragerðis á deginum.
Í ár heldur Kjörís upp á 50 ára afmæli sitt og ber Ísdagurinn keim af því samkvæmt fréttatilkynningu Kjöríss.
„Lögð verður sérstök ísleiðsla úr verksmiðjunni og út á bílaplan. Þar verða dælurnar í stanslausri notkun allan daginn og mega gestir borða eins mikinn ís og þeir geta í sig látið. Í fyrra runnu um tvö og hálft tonn af ís ofan í gesti Ísdagsins. Ásamt hinum hefðbunda ís verður líkt og síðustu ár boðið upp á alls kyns ólíkindabrögð sem ísgerðarmenn Kjöríss hafa leikið sér með, líkt og aspasís, hnetusmjörsís, kampvínsís og lúsmís. Eins verða auðvitað margar gómsætar tegundir eins og súkkulaði veganís, kókosbolluís og fleiri.
Skemmtidagskrá verður á staðnum fyrir börn og fullorðna en Ingó Veðurguð mætir með gítarinn, Daði Freyr fer á svið, hin hvergerðska Birna tekur lagið og herra Hnetusmjör tryllir lýðinn. Einnig mæta BMX brós og Hjalti úrsus með þrautabraut en kynnir á hátíðinni verður Lalli töframaður.
Ýmislegt skemmtilegt verður í boði fyrir börnin í Listasafni Árnesinga eins og byggingasamkeppni þar sem verðlaun eru í boði. Þar verður einnig risagíraffi og fleira skemmtilegt alla helgina.“