Oft getur verið mjög þægilegt að panta pítsu þegar mikið er um að vera og lítill tími til að elda. Þá er dásamlegt að gera vel við fjölskyldumeðlimina með ylvolgri pítsu.

Sjaldnast klárast öll pítsan úr kassanum, en einhverjir standa í þeim misskilningi að pítsa sem er pöntuð á veitingastað geymist ekki lengi í ísskáp, jafnvel ekki lengur en einn dag. Mataröryggissérfræðingurinn Janilyn Hutchings leiðréttir hins vegar þennan misskilning í samtali við Popsugar.

Janilyn segir að pítsan endist í þrjá til fjóra daga í ísskáp ef hún er geymd í lofttæmdu íláti en ekki í kassanum sem hún var sett í á veitingastaðnum. Ef heimilisfólkið sér ekki fram á að klára pítsuna innan þriggja til fjögurra daga þá segir Janilyn það þjóðráð að frysta flatbökuna.

„Tæknilega séð er öruggt að geyma frosinn mat eins lengi og maður vill í frystinum en gæði matarins minnka eftir ákveðinn tíma.“