Sex kærur hafa verið birtar fyrirtækinu Conagra Brands vegna vörumerkis þeirra, eldunarspreysins Pam. Þeir sem stefna fyrirtækinu halda því allir fram að Pam-flöskurnar hafi sprungið í loft upp og valdið miklum eldsvoða sem í kjölfarið olli alvarlegum brunasárum, blindu og afskræmingu.

Sagt er frá málinu á vef Delish en í fréttinni kemur fram að um hönnunargalla sé að ræða og tilteknar flöskur séu ekki lengur í framleiðslu.

Eitt atvikið sem kemur fram í ákærunum átti sér stað á veitingastaðnum Baja Grill í Houston í Bandaríkjunum, en það náðist á myndband eins og sést hér fyrir neðan.

Annað atvik á að hafa átt sér stað í versluninni Walmart. Kona að nafni Y’Tesia Taylor heldur því fram að hún hafi sett Pam-flösku í verslunarkerru sína og að hún hafi sprungið strax í kjölfarið. Hún segir að efri hluti líkama hennar hafi brennst alvarlega og að hún hafi verið í dái í tvær vikur.

Forsvarsmenn Conagra Brands hafa sent frá sér yfirlýsingu og segja almenning engar áhyggjur þurfa að hafa vegna málsins. Þeir segja að Pam-spreyið sé 100 prósent öruggt sé það notað á réttan hátt og að leiðbeiningar séu skýrar bæði framan og aftan á flöskunum. Þá benda þeir einnig á að flöskurnar sem deilt er um séu ekki lengur á markaðinum eins og áður segir.