Það kannast eflaust margir við að þrá snarl á kvöldin og oft erfitt að detta ekki í sykursukk og svínarí seint á kvöldin. Það er hins vegar hægt að svala þessari þörf án þess að spilla mataræðinu, en í grein The Sun er farið yfir fimm matvæli sem hægt er að borða á kvöldin – matvæli sem geta hjálpað þér að grennast.
Popp er í raun eitt af hollasta snarli sem fyrirfinnst – þá ekki örbylgjupopp eða popp sem er löðrandi í smjöri, heldur popp sem maður poppar sjálfur heima, án mikils magn af olíu eða smjöri. Í þrjátíu gramma skammti af slíku góðgæti eru aðeins 122 kaloríur, en popp er einnig fitulítið og trefjamikið. Því er popp afar gott fyrir meltinguna.
Gulrætur eru stútfullar af trefjum, A-vítamíni og kalíum. Þá innihalda þær einnig efni sem heitir alfa-karótín sem vísindamenn telja að hafi góð áhrif á svefn okkar. Ein önnur ástæða fyrir því að gulrætur eru gott kvöldsnarl er sú að þær eru stökkar og minna því um margt á flögur. Einnig þarf afar fáar gulrætur til að losna við hungurverki.
Það finnst mikið af kalíumi í grískri jógúrt en það ku hafa góð áhrif á svefninn sé þess neytt rétt fyrir háttartíma. Þá er mikið prótein í jógúrtinni sem gefur góða fyllingu. Í þessu matvæli er einnig mikið af kasín próteini sem getur minnkað hungur á morgnana sé það borðað fyrir svefninn. Neytendur skulu þó passa sig að borða fitulítið og sykurskert jógúrt fyrir svefninn.
Heilkornakex með hummus er frábært kvöldsnarl. Það er næringarríkt og gerir svefninn betri. Hummus er búið til úr kjúklingabaunum, sem innihalda amínósýruna trýptópan, sem breytist í serótónín í líkamanum og loks melatónín. Trefjarnar og próteinið í kjúklingabaununum og kolvetnin í kexinu fylla magann fyrir háttatíma.
Það hafa ekki allir smekk fyrir kotasælu en hún er full af próteini og getur hraðað brennslu. Það er einnig lítil fita í kotasælu. Vísindamenn í háskólanum í Flórída halda því fram að neysla þrjátíu gramma af próteins þrjátíu mínútum fyrir svefninn geti haft jákvæð áhrif á vöðvabyggingu, efnaskipti og heilsuna almennt. Þar kemur kotasæla sterk inn.