53 prósent foreldra ná ekki að lesa úr svipbrigðum barna sinna þegar þau borða samkvæmt nýlegri rannsókn. Matvælafyrirtækið Piccolo, sem framleiðir lífrænan barnamat, hefur því búið til skýringarmyndir til að útskýra hvað svipir ungbarna þýða þegar þau borða. Sagt er frá málinu á vef Mirror.
Þegar að fullorðnir fetta upp á nef sitt þegar þeir borða þýðir það vanalega að þeim líkar ekki maturinn. Meðal barna er það vissulega merki um höfnun en ekki þvert nei, því þau eru til í að smakka aðeins meira til að finna út hvort þeim líkar maturinn eður ei.
Börnin eru einfaldlega að finna út úr nýju bragði og finnst það ekkert sérlega gott. Hins vegar er ekkert því til fyrirstöðu að leyfa barninu að prófa matinn í nokkur skipti til að sjá hvort maturinn fellur loks í kramið.
Foreldrar halda oftast að börnunum líki ekki maturinn þegar þau yggla brýnnar. Þessi svipbrigði þýða hins vegar að börnin eru forviða yfir matnum og eru að reyna að finna út úr því hvort þeim finnst bragðið gott eða vont.
Börn eru yfirleitt hæstánægð með að fá eitthvað sætt og salt, líklegast vegna þess að þannig bragðast brjóstamjólkin.
Þegar að börnin galopna munninn eftir að hafa smakkað mat þá finnst þeim hann væntanlega beiskur. Ekki draga þær ályktanir að börnunum líki ekki maturinn. Vissulega gætu þau hatað þennan mat en hugsanlega þurfa þau bara að venjast honum.
Ekki neyða börn til að borða matinn ef þau kreppa andlitið saman. Maturinn er súr og fullorðnir gera eflaust svipaðan svip þegar þeir bíta í eitthvað súrt, til dæmis sítrónu. Ekki láta deigan síga og prófaðu að gefa barninu matinn aftur ef það vill hann.
Ef börnin opna munninn og elta matinn þá þýðir það að þeim líkar við það sem þau voru að smakka og vilja meira. Þetta segir sig sjálft.
Ef barnið er hissa á svipinn þá er það að reyna að átta sig á bragðinu og er til í að smakka eitthvað nýtt.
Þetta er annað frekar augljóst merki, en nú um að barnið vilji matinn alls ekki. Ef það dregur sig frá matnum og snýr höfðinu frá honum þá vill það ekki matinn. Þá er líklegast best að prófa einhver önnur matvæli.