Á næstunni verða tollar á margar evrópskar vörur hækkaðir í Bandaríkjunum og þar á meðal eru ostar. Þetta hefur orðið til þess að innflytjendur þar vestra hamstra margir hverjir evrópska osta þessa dagana og nema kaupin mörgum milljónum dollara.

Meðal vinsælustu ostanna eru Parmigiano Reggiano og Provolone frá Ítalíu. Nýju tollarnir taka gildi 18. október. Þeir munu leggjast á mörg hunduð evrópskar vörur. 25 prósent tollur verður lagður á frönsk vín, viský frá Skotlandi og ítalska osta.

Einn stærsti innflytjandi osta í Bandaríkjunum, Schuman Cheese í New Jersey, telur að innflutningur muni dragast saman um 30 prósent vegna tollanna. Talsmaður samtaka bandarískra ostainnflytjenda sagði að reikna megi með að innflutningur á evrópskum ostum dragist saman um 1,5 milljarða dollara á ári. Nú nemur innflutningurinn 3,5 milljörðum dollara á ári.