Alfreð Fannar Björnsson, sem gengur undir nöfnunum Alli Tralli og BBQ kóngurinn á samfélagsmiðlum, fór með grillmetnaðinn alla leið fyrir stuttu þegar hann endurgerði sögufrægu McRib-samlokuna sem aðdáendur McDonald’s ættu að þekkja.
McDonald’s-staðir vestan hafs endurvöktu nýverið lokuna, en þó tímabundið. Því ættu aðdáendur lokunnar að vera vanir þar sem hún hefur komið og farið af matseðlum síðan hún leit fyrst dagsins ljós árið 1981.
Hefðbundin McRib-samloka samanstendur af beinlausum svínabóg sem mótaður var til að líkjast rifjum, barbikjú sósu, lauk og súrum gúrkum í hvítu brauði.
„Mig hefur langað að gera þetta lengi og lét verða af því, nema með alvöru „babyback“-rifjum,“ segir Alli. Með kjötinu setti hann karamelliseraðan lauk, súrar gúrkur og jalapeno. Hann deilir glaður uppskriftinni með lesendum matarvefsins og vonar að allir hafi gaman af.
Rif – Hráefni:
„babyback“ rif
paprikukrydd
salt og pipar
laukduft
hvítlauksduft
chili duft
ground mustard
cayenne pipar
púðursykur
100 ml eplasafi
1 msk hunang
2 msk púðursykur
Aðferð:
Rifin krydduð með paprikukryddi, salti, pipar, laukdufti, hvítlauksdufti, chili dufti, ground mustar, cayenne pipar og púðursykri.
Rifin voru reykt með eplavið í 2 klukkutima á 125 gráðum.
Svo tekin af og pakkað inn í álpappír með púðursykri, hunangi og eplasafa í 2 tima til viðbótar.
Álpappír tekinn, beinin tekin úr og rifin pensluð með barbikjú sósu.
Karamelliseraður laukur – Hráefni:
laukur
smjör
sykur
Aðferð:
Leyfa lauk að malla í smjöri þangað til hann verður mjúkur og glær. Svo er helling af sykri sett út á og leyft að malla í smá tíma. Þetta er bara slump.
Hægt er að fylgjast með Alla á Snapchat undir nafninu alli-tralli og á Instagram undir @bbqkongurinn.
