Ástjörn er umlukin stórkostlegri náttúrufegurð
Sumarbúðirnar Ástjörn í Kelduhverfi eru fyrir drengi og stúlkur á aldrinum 6–12 ára og 13–15 ára unglinga. Börnin koma alls staðar að af landinu. „Mörg börnin sem koma til okkar eiga foreldra sem voru í sumarbúðum hjá okkur þegar þeir voru börn og það er mjög ánægjulegt því það sýnir að foreldrarnir vilja veita börnunum sínum það sem þau sjálf upplifðu hér,“ segir Árni Hilmarsson forstöðumaður.
Flest börnin koma í einn flokk, en sum dvelja lengur. Flokkarnir eru 8 og 10 dagar. Tjörnin og birkiskógurinn umhverfis sumarbúðirnar er endalaus uppspretta leikja og útiveru. Má nefna t.d. knattspyrnu- og körfuboltavöll, kvöldvökur, söng, Biblíutíma, föndur, alls kyns leiki og keppnir í skóginum og víðar, íþróttahús í næsta nágrenni, sund í tjörninni eða fjöruferð á góðviðrisdögum, hestaleigu og margt fleira. Bátar eru af ýmsum gerðum: Árabátar, kajakar, kanóar, hjólabátar og skútur. „Hjá okkur er stærsti bátafloti í sumarbúðum á Íslandi, en við erum með um 30 báta af öllum gerðum, meira að segja svokallaða sökkvibáta!“ segir Árni, en það eru bátar sem börnin mega sökkva á góðviðrisdögum þegar synt er í tjörninni. Hornsílaveiðar eru sívinsælar.
Ástjörn hefur þá sérstöðu að um er að ræða einu sumarbúðirnar á Íslandi sem eru í þjóðgarði, Vatnajökulsþjóðgarði, rétt hjá Ásbyrgi í Kelduhverfi. Einnig hefur Ástjörn þá sérstöðu að þvottahús er á staðnum þar sem allt er þvegið af börnunum og fara þau því heim með hrein föt í töskunni, mörgum foreldrum til mikillar ánægju.
Skráningu og upplýsingar er hægt að nálgast í síma 462-3980, á heimasíðunni www.astjorn.is og einnig á facebook.com/astjorn. Einnig er hægt að sjá margar myndir þar, og sömuleiðis myndbönd á youtube.com/astjorn
Netfang er astjorn@astjorn.is