Ísbúðin Laugalæk
[[C302732506]][[C302732506]][[B3A97C687B]]Rekin hefur verið ísbúð að Laugalæk 8 síðan árið 1961 og óhætt er að segja að húsið sé „íssögulegur staður“ eins og Lóa Bjarnadóttir, núverandi eigandi búðarinnar, segir. Um tíma voru þarna tvær ísbúðir, hlið við hlið. Lóa ólst upp í hverfinu, raunar við hliðina á ísbúðunum tveimur, og segist hafa borðað tvo ísa á dag. „Þetta var kannski aðalísstaðurinn í bænum fram til sirka 1990. Mig grunaði aldrei á þessum tíma að ég ætti eftir að verða íssali, hvað þá íssalinn á þessum stað,“ segir Lóa.
„Árið 2009 var gamla ísbúðarhúsnæðið í niðurníðslu. Þá fékk ég þá hugmynd að opna ísbúð. Margir sögðu að við værum gengin af göflunum, en þetta var fyrsta ísbúðin sem opnuð var eftir hrun,“ segir Lóa.
Til að gera langa sögu stutta fóru viðtökurnar fram úr björtustu vonum og Ísbúðin Laugalæk er vinsæl sem aldrei fyrr. Sérstaða hennar í dag felst í tvennu. Annars vegar að staðurinn er að hálfu leyti undir pylsuveitingum og hins vegar eru það heimagerðu íssósurnar sem þykja einstakar.
„Pylsurnar innihalda svínabóg og krydd og það er allt og sumt. Þær innihalda ekkert vatn og eru algjörlega án aukaefna. Pylsurnar eru annars vegar bornar fram í brauði á hefðbundinn hátt eins og við Íslendingar þekkjum, og hins vegar sem Currywurst, á bakka með karrísósu og salötum sem við gerum sjálf, og brauðið til hliðar. Currywurst er þjóðarréttur Þjóðverja en við erum eini staðurinn á Íslandi sem býður upp á þær,“ segir Lóa.
Pylsurnar eru seldar undir framleiðslunafninu Reykjavik Sausage Company en fyrirtækið er það sama.
Íssósurnar eru heimagerðar sósur án allra aukaefna og er um að ræða jarðarberja-, hindberja-, ananas-, mangó-, kókós-, banana- og kirsuberjasósu. Auk þess eru í boði hefðbundnar sósur, heit og köld súkkulaðisósa, heit og kvöld karamellusósa, lakkríssósa og piparmyntusósa.
Blaðamaður heimsótti staðinn fyrir skemmstu og fékk sér fyrst þýska Bratwurst og síðan ís í eftirrétt. Óhætt er að mæla með þessari ljúffengu samsetningu í hádegismat öðru hverju og ekki spillir fyrir að þarna er smekklegt umhverfi til að njóta veitinganna í. Bæði pylsan og ísinn brögðuðust framúrskarandi vel.
Innréttingar í Ísbúðinni Laugalæk þykja aðlaðandi. Lögð er áhersla á persónulega og góða þjónustu. Gott kaffi er í boði á staðnum sem er öðrum þræði hverfiskaffihús. Það er því einstaklega notalegt að setjast þar niður og njóta veitinganna.
Sem fyrr er Ísbúðin Laugalæk staðsett að Laugalæk 8 og síminn er 561-2244.
Opið er alla daga frá kl. 11.00 til 23.30.
Ísbúðin Laugalæk er auðvitað á Facebook.