Edward Huijbens, varaformaður VG og prófessor við Háskólann á Akureyri, tilkynnti nýverið að hann væri að flytja til útlanda. Hann myndi því ekki gefa áframhaldandi kost á sér í embættið á komandi landsfundi í haust. Edward var kjörinn árið 2017 og sigraði þá Óla Halldórsson, sveitarstjórnarmann í Norðurþingi.

Edward hefur verið lítt sýnilegur en nú gæti sú staða komið upp að staðan yrði eftirsótt. Rósa Björk Brynjólfsdóttir og Andrés Ingi Jónsson hafa ekki sagt sig úr flokknum þó að þau hafi lýst því yfir að þau styðji ekki stjórnina. Annað hvort þeirra, þá helst Rósa, gæti séð hag sinn í því að fara fram.

Á móti Rósu gæti boðið sig fram Kolbeinn Óttarsson Proppé, sem einn helsti varðhundur Katrínar Jakobsdóttur og flokksforystunnar. Vinstri græn á landsbyggðinni gætu einnig gert kröfu um að einhver úr þeirra röðum yrði varaformaður.