Hraun er tekið að renna yfir Grindavíkurveg gegnt afleggjaranum að Bláa lóninu. Hlutirnir hafa gerst nokkuð hratt síðastliðna klukkustund eða svo en Víðir Reynisson, sviðsstjóri hjá Almannavörnum, sagði í aukafréttatíma RÚV í morgun að ekki væri nein bráð hætta af hraunstraumnum. Þá var hraunbreiðan um einum kílómetra frá Grindavíkurvegi.

Hjördís Guðmundsdóttir, upplýsingafulltrúi Almannavarna, segir í samtali við DV að það hafi verið viðbúið að hraun gæti farið yfir Grindavíkurveg eins og nú hefur gerst.

„Það sem veldur okkur áhyggjum er í hvaða átt hraunið er að fara yfir veginn. Það er það sem veldur okkur miklum áhyggjum,“ segir Hjördís og bætir við starfsmenn HS Veitna séu að hlaupa hratt þessa stundina til að koma í veg fyrir að versta sviðsmyndin raungerist.

Svo gæti farið að hraun renni yfir hitaveituæð HS Veitna í Svartsengi en ef það gerist er hætta á að ekkert heitt vatn verði á Suðurnesjum og í nágrenni. Hjördís segir að vegna þessa sé verið að færa viðbúnaðarstig Almannavarna á hættustig en það er þegar á neyðarstigi vegna eldgossins.

Páll Erland, forstjóri HS Veitna, segir í frétt Vísis að hættan nú sé sú að hraunið stefni á hitaveituæðina til Reykjanesbæjar og sveitarfélaganna í kring.
Aðspurður hvort þá gæti heitavatnsæðin hreinlega rofnað, segir hann:

„Já, það er það sem við höfum kallað svartasta sviðsmyndin og hún er hreinlega í kortunum núna en við vitum ekki hversu langt hraunfælðið mun ná,“ sagði Páll og bætti við að þetta væri spurning um einhverja klukkutíma þar til hraunið nær æðinni. Segir hann að HS Veitur séu í nánu samstarfi með Almannavörnum og vísindamönnum að meta stöðuna.

Eins og sjá má á þessu stutta myndskeiði úr vefmyndavél RÚV rennur hraunið hratt og tilraunir gröfunnar reyndust haldslausar en skömmu síðar var þessi litli varnargarður alfarið kominn undir hraun.

Úr vefmyndavél RÚV