Lilja Katrín Gunnarsdóttir, núverandi yfirmaður dægurmáladeildar DV, hefur verið ráðin sem ritstjóri Frjálsrar fjölmiðlunar. Mun hún formlega taka við stjórnartaumunum á mánudag en einnig verður annar ritstjóri ráðinn til félagsins sem rekur DV og dv.is

„Þetta er gífurlega spennandi verkefni og talsverð áskorun, en það er ágætt við og við að þjóta út fyrir þægindarammann. Mér þykir afar vænt um DV og tel mig afar heppna að fá að þróa miðilinn áfram í samvinnu með góðu fólki,“ segir Lilja Katrín.

Hinn nýráðni ritstjóri hefur fimmtán ára reynslu og hefur meðal annars starfað sem ritstjóri Séð og heyrt og vefstjóri Mannlífs. Þá hefur hún einnig starfað sem umsjónarmaður innblaðs Fréttablaðsins og Lífsins á Vísi. Hún er með háskólagráðu í kvikmynda- og sjónvarpsþáttaleiklist. Hefur hún einnig starfað á því sviði, bæði sem leikari og handritshöfundur.

„Ég hef átt þeirri lukku að fagna síðustu fimmtán árin að vinna undir og með mörgu af fremsta fjölmiðlafólki landsins. Ég á því stóran reynslubanka að leita í og er ávallt þakklát því fólki sem ég hef unnið með í þessum bransa á lífsleiðinni. Þau hafa leitt mig á þann stað sem ég er á í dag.“