Íslenskur maður sem greindist með berklasmit í fyrra lést í janúar, en um var að ræða einstakling sem dvaldi gjarnan í gistiskýli í miðborginni þar sem hann er talinn hafa smitast.

Greint er fá þessu í Morgunblaðinu í dag.

Í gær var greint frá því að átta starfsmenn á bráðamóttöku Landspítalans hefðu greinst með berkla við skimun, þar á meðal voru læknir, hjúkrunarfræðingur og móttökuritari. Engir starfsmenn munu þó hafa orðið veikir eða sýnt einkenni.

Í Morgunblaðinu í dag er rætt við Ragnar Frey Ingvarsson, sérfræðilækni á spítalanum og formann Læknafélags Reykjavíkur, og er hann ómyrkur í máli.

„Aðstæður á bráðamóttökunni hafa í meira en áratug verið mjög slæmar. Lítið fer fyrir sóttvörnum þegar tugir sjúklinga eru á göngum og erfitt að verja sjúklinga og starfsmenn fyrir mögulegum sýkingum. Þegar aðstæður eru svona lengi leiðir það óumflýjanlega til þess að eitthvað brestur og það hefur augljóslega gert það í þessu tilfelli.“