Kílómetragjald hefur nú verið tekið upp fyrir öll ökutæki og greiða eigendur bifreiða, sem eru upp í 3,5 tonn, sama gjaldið fyrir hvern ekinn kílómetra.
Runólfur skrifar grein um málið á vef Vísis þar sem hann bendir á að FÍB hafi frá upphafi lagt til að kílómetragjald tæki mið af þyngd viðkomandi bíls ásamt losun koltvísýrings.
„Þá væri sú staða ekki uppi núna að kílómetragjald er óhagstætt fyrir litla og eyðslugranna bíla, en hagstætt fyrir eyðslufreka og þunga bíla,” segir hann.
Runólfur rifjar upp að vorið 2023 hafi FÍB kynnt tillögu að formúlu til að reikna út kílómetragjald sem myndi endurspegla áhrif hvers einasta bíls á umhverfið ásamt álagi hans á vegakerfið.
„Umhverfisáhrifin koma fram í útblæstri koltvísýrings við eldsneytisbruna. Álag á vegakerfið endurspeglast í þyngd bílsins. Auðvelt er fyrir ríkið að nota þessa formúlu við útreikning kílómetragjaldsins – upplýsingar um útblástur og þyngd eru skráðar hjá Samgöngustofu.”
Hann segir að FÍB hafi hvatt stjórnvöld til að miða kílómetragjaldið við hvern og einn bíl.
„Ekki var farið eftir þeim ábendingum heldur ákveðið að eitt og sama gjaldið skyldi vera fyrir bíla undir 3,5 tonnum. Það er í fullkominni andstöðu við sjónarmið í loftslagsmálum,” segir hann og tekur fram að FÍB hafi stutt kílómetragjaldið á þeim forsendum að það endurspegli afnot af vegakerfinu og styðji við orkuskipti.
„Flatt kílómetragjald á 90% af bílaflota landsmanna gerir það ekki nema að takmörkuðu leyti. Ekki er þó öll von úti. Í samtölum FÍB við stjórnvöld hefur komið fram að innheimtuaðferðin verði tekin til endurskoðunar með meiri sanngirni að leiðarljósi.”
