Samfylkingin lagði sérstaka áherslu á Snæfellsnes og Vestfirði að þessu sinni.
Ása Berglind Hjálmarsdóttir, þingkona flokksins, segir frá því á Facebook-síðu sinni að í gær hafi sá hluti hópsins sem var á Snæfellsnesi ætlað að sameinast hópnum sem var á Ísafirði, en það fór ekki alveg samkvæmt áætlun.
„Eftir siglingu með Baldri þá kom í ljós að Dynjandisheiði var lokuð svo við tókum ákvörðun um að fara Djúpið eftir samtal við Vegagerðina sem sagði það ætti að ganga. Það fór þó ekki betur en svo að við lentum inn í skafli í Skötufirði sem varð til þess að við fengum að kynnast mikilvægum innviðum á Vestfjörðum, björgunarsveitinni Kofra sem kom okkur til bjargar. Ekki nóg með það, þá var Súðavíkurhlíðin lokuð þegar við vorum laus úr skaflinum. Þá var heimavarnarliðið hennar Örnu okkar á Ísafirði ræst út og siglt til Súðavíkur að sækja okkur,” segir Ása sem birtir myndir og myndbönd frá ævintýrinu.
Arna Lára Jónsdóttir, varaformaður þingflokksins, gerði slíkt hið sama á sinni síðu og má sjá báðar færslurnar neðst í fréttinni.
„Það má nú alveg hlæja af okkur þingmönnunum að lenda í þessu og fá á sama tíma þessa góðu innsýn inn í raunveruleika þeirra landsmanna sem búa við svona krefjandi aðstæður í sínu daglega lífi. Við vorum heppin að það var símasamband á þessum vegarkafla því víða er það gloppótt á þessum slóðum. Undir þessari hlíð sem við vorum stopp er líka oft snjóflóðahætta, rétt eins og í Súðavíkurhlíð sem lokar reglulega með tilheyrandi óþægindum og óöryggi.“
Ása Berglind segir að lokum að fulltrúar björgunarsveitarinnar Kofra hafi sagt þeim að bíllinn sem kom þeim til bjargar hafi í raun verið fjárfesting sem þau gátu ráðist í vegna gjafar sem sveitin fékk.
„Þau hafa líka nýlega fjárfest í bát sem hefur skipt miklu máli þegar fólk veikist í Súðavík og hlíðin lokuð. Það er gömul saga og ný að björgunarsveitir eru einn af okkar allra mikilvægustu innviðum og vil ég nota tækifærið og þakka Kofra fyrir dýrmæta aðstoð.“
