Umboðsmaður Alþingis hefur lokið meðferð á kvörtun íbúa í fjöleignarhúsi í ónefndu sveitarfélagi. Segist íbúinn hafa þurft að lifa við hávaða og ónæði frá öðrum íbúa í húsinu í áraraðir en vegna smæðar sveitarfélagins hafi hann veigrað sér við að leita til lögreglu.
Kvörtunin var lögð fram í síðasta mánuði. Fram kom í henni að um árabil hafi mikill hávaði og ónæði borist frá næstu íbúð fyrir ofan þá sem íbúinn leigir í tilgreindu fjöleignarhúsi. Segist íbúinn hafa veigrað sér við að leita til lögreglu vegna málsins þar sem hann búi í litlu samfélagi. Af þeim sökum og þar sem hann hafii ekki vitað hvernig best væri að snúa sér í málinu hafi hann leitað til umboðsmanns í von um að hann gæti beitt sér í málinu eða unnið að því að málið verði kannað til að fá skýringar á því.
Einkamál
Umboðsmaður bendir hins vegar íbúanum á að ágreiningur sem kunni að koma upp á milli eigenda og íbúa í fjöleignarhúsi sé í eðli sínu einkaréttarlegur og falli þar af leiðandi utan starfssviðs umboðsmanns. Því sé ekki mögulegt að taka kvörtunina til nánari athugunar.
Bendir umboðsmaður þó á að í lögum um fjöleignarhús sé fjallað um húsreglur og segi þar að stjórn húsfélags skuli semja og leggja fyrir húsfund til slíkar reglur og skuli í þeim meðal annars fjallað um bann við röskun á svefnfriði í húsinu a.m.k. frá miðnætti til kl. 7 að morgni og undanþágur frá því banni. Í lögunum segi enn fremur að greini eigendur fjöleignarhúsa á um réttindi sín og skyldur samkvæmt lögunum geti þeir leitað til kærunefndar húsamála og óskað eftir álitsgerð um ágreiningsefnið sem kærunefndin skuli láta í té svo fljótt sem kostur sé. Telji kærunefndin að lög um fjöleignarhús hafi verið brotin og að á rétt aðila sé hallað beini hún tilmælum til gagnaðila um úrbætur. Það séu þó aðeins eigendur í fjöleignarhúsi sem geti leitað til nefndarinnar en eins og áður segir er íbúinn leigjandi í húsinu.
Sá möguleiki virðist því vera fyrir hendi að íbúinn biðji eiganda íbúðarinnar að grípa til aðgerða og að minnsta kosti leita til kærunefndar húsamála.
