Þýsk kona á sextugsaldri, og tveir erlendir karlmenn á fertugsaldri, sem eru búsettir hér á landi, hafa verið ákærð fyrir stórfellt fíkniefnabrot.

Eru þremenningarnir sökuð um að hafa staðið að innflutningi á 15 kg af ketamíni og 5 kg af MDMA kristöllum hingað til lands. Efnin voru falin í bíl sem fluttur var hingað frá Hollandi. Voru efnin í 20 pakkningum í tveimur leynihólfum undir framsætum bílsins. Fundust efnin í iðnaðarbili í Hólshrauni 7 í Hafnarfriði þann 19. september 2025 en þar voru öll þrjú ákærðu handtekin er þau voru að flytja efnin úr bílnum.

Það var þýska konan sem kom með efnin til landsins frá Hollandi. Tók hún ferjuna Norrænu til Seyðisfjarðar og ók þaðan til Hafnarfjarðar. Hún hitti annan meðákærða við Fjarðarkaup, Hólshrauni 1 í Hafnarfirði, og tók við 290 þúsund krónum í reiðufré frá honum. Þaðan ók hún bílnum að Hólshrauni 7, þar sem fólkið var handtekið, eins og áður var lýst.

Karlmönnunum tveimur er gefið að sök að hafa lagt á ráðin um innflutning á efnunum og greiddi annar þeirra óþekktum manni fyrir þau í gegnum reikning sinn hjá erlendu fjármálafyrirtæki.

Málið verður þingfest við Héraðsdóm Reykjaness næstkomandi fimmtudag, þann 8. janúar. Miðað magn fíkniefnanna og dómafordæmi má búast við því að ákærðu verði dæmd í margra ára fangelsi.