Óstaðfestar tilkynningar hafa undanfarið birst á Facebook þess efnis að íslenskur maður, sem barðist með Úkraínuher gegn Rússum, hafi látist í átökum.
DV hafði samband við nokkra ættingja mannsins og hefur lát hans nú verið staðfest. Maðurinn hét Kjartan Sævar Óttarsson og var 51 árs gamall, búsettur í Svíþjóð seinni árin.
Bróðir Kjartans, Hörður Harðarson, baðst undan viðtali en tók saman eftirfarandi yfirlýsingu fyrir hönd fjölskyldu Kjartans:
„Ég get staðfest að Kjartan gekk í úkraínska herinn fyrir stuttu. Ég heyrði síðast í honum 20. desember og þá sagðist hann verða sambandslaus í a.m.k. tvær vikur og hann myndi hafa samband við fyrsta tækifæri.
30. desember fórum við að fá óstaðfestar upplýsingar í gegnum Facebook og Messenger um að hann hafi fallið í drónaárás. Í kvöld fengum við síðan staðfestingu á því að Kjartan hefði látist í Úkraínu.
Við höfum því miður ekki frekari upplýsingar um málið og það gæti tekið tíma að afla þeirra. Fjölskyldan óskar eftir frið til þess að meðtaka þessar fréttir og við munum ekki gefa kost á okkur í opinber viðtöl.“
