„Það er ótrúlegt að heyra um framferði ofstækismanna í Háskóla Íslands þegar hleypt var upp fundi þar fyrir skemmstu,” segir Jón Steinar í færslu á Facebook-síðu sinni.
Vísar hann í atvik sem átti sér stað í Háskóla Íslands fyrr í þessum mánuði þegar ísraelski hagfræðiprófessorinn Gil Epstein ætlaði að halda fyrirlestur um áhrif gervigreindar á vinnumarkað og lífeyrismál. Mótmælendur komu í veg fyrir að fyrirlesturinn gæti farið fram og var Ingólfur Gíslason, lektor við HÍ, einn þeirra sem tók þátt í mótmælunum.
„Það er eins og þessir ofstækismenn séu komnir aftan úr forneskju í aðgerðum sínum gegn tjáningarfrelsi hér á landi. Framferði þeirra er ósæmilegt á alla mælikvarða. Viðbrögð yfirvalda í Háskólanum eru ennþá verri. Rektor Háskóla Íslands ætti auðvitað að ganga fremstur í að fordæma þessa árás á tjáningarfrelsi á vettvangi skólans. En frá honum hefur hvorki heyrst hósti né stuna,“ segir Jón Steinar og vísar í leiðara Morgunblaðsins í dag þar sem fjallað er um málið.
„Þar er sagt flest sem segja þarf um málið. Eitt vantar þó í frásögn blaðsins. Það er krafa um að rektor skólans, sem nýlega hefur tekið við störfum með hátíðlegum yfirlýsingum um tjáningarfrelsi á vettvangi skólans, verði þegar í stað vikið úr starfi. Það hlýtur að vera skýlaus krafa allra þeirra sem segjast styðja tjáningarfrelsi að víkja beri þessum æðsta yfirmanni skólans þegar í stað úr starfi, því hann beitir hér sýnilega þögninni til samþykkis við þessu ofbeldisverki. Í húfi er virðing Háskóla Íslands.“
Færsla Jóns Steinars hefur vakið nokkra athygli og sitt sýnist hverjum. Sigurður Már Jónsson spyr hvort ekki sé full bratt að kalla eftir afsögn rektors þó sannarlega sé kallað eftir yfirlýsingu hennar.
„Hún hefur haft næg tækifæri til að tjá sig en þegir bara. Máltækið segir að þögn sé sama og samþykki. Ertu Sigurður á því að rektor sem samþykkir svona framferði innan skólans eigi bara að sitja áfram? Við erum hér á landi alltof lin í að láta embættismenn taka ábyrgð á sjálfum sér.“
