Á fundi menningar- og þjónusturáðs Reykjanesbæjar í gær var tekin fyrir ósk frá íbúa í bænum um að sveitarfélagið myndi beita sér fyrir að komið yrði á fót kvikmyndahúsi en ekkert slíkt hús er í rekstri í þessu fjórða fjölmennasta sveitarfélagi landsins. Ráðið hvetur til þess að kvikmyndahúsarekstur í bænum verði endurreistur og ljóst er því að einhver vilji er til staðar um að opna aftur slíkt hús.
Eina kvikmyndahúsinu í Reykjanesbæ var lokað síðasta haust. Þar var um að ræða Nýja-Bíó sem hafði verið í rekstri frá 1937 en í húsnæði við Hafnargötu frá 1944 allt til loka. Fjölskyldan sem rekur Sambíóin eignaðist Nýja-Bíó 1967 en það var gert upp 1998 og var upp frá því rekið með formlegum hætti undir merkjum Sambíóanna. Fjölskyldan útskýrði lokunina einkum með lítilli aðsókn vegna tilkomu streymisveitna og þess að hluti íbúa í bænum og annars staðar á Suðurnesjum kysi það oft að leggja frekar á sig ferðir á höfuðborgarsvæðið til að fara í bíó.
Á árunum 1955-1999 voru raunar tvö kvikmyndahús í bænum eða réttara sagt þeim hluta hans sem var Keflavíkurbær fram til 1994 þegar Keflavík, Njarðvík og Hafnir sameinuðust í Reykjanesbæ. Hitt kvikmyndahúsið hét Félagsbíó og var rekið af Verkalýðs- og sjómannafélagi Keflavíkur og nágrennis en húsið var einnig samkomuhús og leikhús á sínum gullaldarárum. Nánar má lesa um Félagsbíó og fleiri kvikmyndahús sem horfið hafa á spjöld sögunnar hér.
Í fundargerð menningar- og þjónusturáðs segir um ósk íbúans að hann óski eftir að Reykjanesbær skoði möguleika þess að koma kvikmyndahúsi aftur á fót í svipaðri mynd og áður eða með nýjum og skapandi lausnum svo húsið gæti einnig nýst til annarra menningarviðburða.
Menningar- og þjónusturáð segist í bókun sinni þakka fyrir erindið. Sveitarfélagið muni aftur á móti ekki standa að rekstri kvikmyndahúss en ráðið hvetji áhugasama einkaaðila til að skoða möguleika á þess háttar rekstri.
Hvort einhverjir einkaaðilar muni svara kallinu og hvort áhugi íbúa í Reykjanesbæ og annars staðar á Suðurnesjum á endurreisn kvikmyndahúsarekstrar sé nógu mikill til að hann beri sig á eftir koma í ljós. Gerist ekkert í þessum efnum er ljóst að slíkur áhugi er ekki til staðar í nægilega miklum mæli.
