Slysavarnafélagið Landsbjörg segir fréttir fjölmiðla af háum launum framkvæmdastjórans villandi. Þar kom fram að Kristján Þór Harðarson, framkvæmdastjóri félagsins, hefði verið með 9,8 milljónir króna í laun á mánuði árið 2024.

Kristján Þór tók við starfinu þann 1. apríl 2021. Í ársreikningi félagsins kemur fram að hann var með 23,8 milljónir kr. Í laun á árinu 2024 og 22,2 milljónir kr. árið 2023.

Í yfirlýsingu frá félaginu kemur fram að stærstur hluti reiknaðra launa sé vegna úttektar séreignasparnaðar Kristjáns Þórs síðustu 35 ár, sem hann hafi leyst út á síðasta ári, líkt og heimilt er við sextugsaldur. 

„Hér er dæmi um hve villandi það er þegar laun eru reiknuð til baka út frá skattgreiðslum, en við úttekt séreignasparnaðar greiddi hann að sjálfsögðu þá skatta sem honum bar, sem svo koma fram í álagningarskrá skattyfirvalda,“ segir í yfirlýsingunni. 

Í yfirlýsingunni kemur fram að félagi greiðir laun í samræmi við stöðu sína sem stærstu samtök sjálfboðaliða í landinu. „Þau eru sanngjörn en eiga talsvert í land með að komast inn á topp tíu listann, hvað þá að toppa hann.“ 

Yfirlýsingin er hér í heild sinni:

Vegna frétta fjölmiðla í morgun um að framkvæmdastjóri Slysavarnafélagsins Landsbjargar hafi á árinu 2024 verið með um 9,8 milljónir í laun á mánuði, er rétt fram komi að stærsti hluti þessara reiknuðu launa eru úttekt  séreignasparnaðar Kristjáns síðustu 35 ára, sem Kristján leysti út á síðasta ári, líkt og heimilt er við sextugs aldur.

Hér er dæmi um hve villandi það er þegar laun eru reiknuð til baka út frá skattgreiðslum, en við úttekt séreignasparnaðar greiddi hann að sjálfsögðu þá skatta sem honum bar, sem svo koma fram í álagningarskrá skattyfirvalda.

Félagið greiðir laun í samræmi við stöðu sína sem stærstu samtök sjálfboðaliða í landinu. Þau eru sanngjörn en eiga talsvert í land með að komast inn á topp tíu listann, hvað þá að toppa hann.