Um fátt er meira rætt um í Bandaríkjunum en Epstein-skjölin svokölluðu og sér í lagi samband níðingsins látna og Donald Trump, Bandaríkjaforseti.
Á undanförnum dögum hefur ýmislegt komið í dagsljósið eða rifjað upp varðandi samband þeirra. Til að mynda að Epstein mætti í brúðkaup Trump og Mörlu Maples árið 1993, sem bendir til þess að mennirnir hafi verið meira en bara kunningjar, eins og forsetinn hefur haldið fram.
Þá greindi Wall Street Journal frá því að í safni bréfa sem Ghislaine Maxwell tók saman í tilefni af fimmtugsafmæli Jeffreys Epstein árið 2003 á að hafa verið að finna bréf merkt nafni Donalds Trump, Bandaríkjaforseta. Bréfið hafi innihaldið nektarteikningu af konu þar sem nafnið „Donald“ var skrifað í stað skapahára. Í lok bréfsins stóð: „Til hamingju með afmælið – og megi hver dagur verða annað yndislegt leyndarmál.“
Trump brást illur við og hyggst kæra blaðið virta fyrir rógburð.
Nú hafa önnur pínleg skilaboð forsetans verið rifjuð upp. Árið 1997 kom út bókin Trump: The Art of the Comeback. Forsetinn sendi þá eintak þegar í stað til Epstein sem innihélt hlýja kveðju. „Til Jeffrey – þú ert bestur,“ skrifaði Trump til vinar síns.
Ljóst er að forsetinn er að verða fyrir gríðarlegri pressu vegna málsins en margir af sanntrúuðum stuðningsmönnum hans eru æfareiðir yfir því að hin svokölluðu Epstein-skjöl hafi ekki verið gerð opinber eins og lofað hafði verið.
Samsæriskenningarnar krauma en margir hafa gaman að því að Trump, sem hefur verið manna duglegastur við að nýta sér slíkar kenningar, sé nú að bragða á eigin meðali.
