RÚV greindi frá því í gær að laun þingmanna, ráðherra, forseta Íslands og æðstu embættismanna hækki um 5,6 prósent um næstu mánaðamót. Verður þingfararkaup eftir breytinguna rúmlega 1,6 milljónir króna á mánuði og hækka launin um 85 þúsund krónur.
Laun ráðherra verða 2,6 milljónir króna en forsætisráðherra 2,9 milljónir króna. Þá var greint frá því í frétt RÚV að laun forseta Íslands verði 4,25 milljónir króna og dómarar við Hæstarétt fái 2,7 milljónir króna frá næstu mánaðamótum. Lögreglustjórar, saksóknarar, seðlabankastjóri og dómarar við aðra dómstóla fá sömu hlutfallshækkun.
Í færslu á Facebook segir Vilhjálmur að æðstu ráðamenn þjóðarinnar séu að svíkja samkomulagið á vinnumarkaði og bendir á að prósentur auki aðeins á ójöfnuð.
„Það er með ólíkindum að sjá hvernig æðstu ráðamenn þjóðarinnar ætla ekki að fylgja þeirri stefnu sem samið var um á hinum almenna vinnumarkaði. Þar var gert samkomulag um hóflegar launahækkanir til að sporna við verðbólgu og skapa skilyrði fyrir lækkun á vaxtabyrði heimilanna. Meðal annars var samið um krónutöluhækkun upp á 23.750 kr. eða um 3,5% fyrir þá sem ekki eru á kauptöxtum,“ segir Vilhjálmur í færslu sinni og bætir við að þetta hafi verið gert til að draga úr verðbólgu, halda vöxtum niðri og verja heimilin fyrir of miklum kostnaðarauka.
„En hvað gera æðstu ráðamenn þjóðarinnar? Þeir samþykkja launahækkun handa sjálfum sér upp á 5,6% – margfalt meiri hækkun en samið var um á almennum vinnumarkaði. Þannig senda þeir skilaboð um að reglurnar sem gilda fyrir launafólk gilda ekki fyrir þá sjálfa.“
Varðandi prósentuhækkanir segir Vilhjálmur að þær séu „aflgjafi óréttlætis“ í íslensku samfélagi.
„Þegar launahækkanir eru gefnar út í prósentum í stað krónutölu þá fær sá sem hefur mest hærri launahækkun í krónum talið. Þannig dýpkar tekjumunurinn og misskiptingin í samfélaginu eykst enn frekar. Þessi aðferð gerir ekkert annað en að auka á ójöfnuð,“ segir hann og nefnir dæmi um þetta.
„Laun þingmanna hafa hækkað úr 748.000 krónum árið 2015 í rúmlega 1.600.000 krónur í dag. Það er hækkun upp á 852.000 krónur – eða 114% á tíu árum. Á sama tíma hefur lægsti taxti verkafólks hækkað úr 229.517 krónum í 452.343 krónur – hækkun upp á 222.826 krónur eða 97%. Þingmenn hafa því fengið meira en tvöfalt hærri hækkun í krónum talið en verkafólk. Er þetta réttlæti? Er þetta samstaða?“
Vilhjálmur segir að þetta sé þróun sem hafi átt sér stað mörg undanfarin ár.
„Að hugsa sér að laun þingmanna og ráðherra hafi ekki bara hækkað tvöfalt meira í krónum talið heldur hafa laun æðstu stjórnenda ríkisins einnig hækkað meira í prósentum talið en verkafólk síðustu 10 ár. Þetta gerist á sama tíma og stjórnvöld á hverjum tíma tala um mikilvægi þess að verkafólk semji um hóflegar launahækkanir til að viðhalda stöðugleika og tala svo um ónýtt vinnumarkaðsmódel.“
Vilhjálmur endar færslu sína á þessum orðum:
„Þetta er orðið fullreynt þegar ljóst er að efri lög samfélagsins taka ekki þátt og ég held að það sé einnig ljóst að á þessa hræsni muni verkafólk ekki vera tilbúið að hlusta á stundinni lengur frá ráðamönnum þessa þjóðar. Enda meira að segja búnir að fá meiri prósentuhækkanir og tvöfalt fleiri krónur þrátt fyrir að lögð hafi verið ofuráhersla á að lækka lægstu taxta verkafólks sérstaklega.“
