„Þarna er dallur undir sprautanálar sem hefur verið settur upp í fimm metra fjarlægð frá barnaleikvelli. Hér eru óvitar og litlir krakkar að leika sér og ekki ólíklegt að þau geti séð þennan dallog tekið hann eða opnað hann. Nálægðin er rosalega óeðlileg, þetta er alvarlegt,“ segir áhyggjufullur faðir níu ára stúlku.

Barnið dvelst hjá móður sinni aðra hvora viku og hina vikuna heima hjá föðurnum. Móðirin býr í leiguhúsnæði í blokk við Írabakka sem er í eigu Félagsbústaða. Þar hafa sumir íbúar valdið nágrönnum sínum gífurlegu ónæði.

„Hér er óregla en hér eru líka barnafjölskyldur og rólegheitafólk með allt sitt á hreinu. Mesta ónæðið er af einum einstaklingi og liðinu sem þeim aðila fylgir. Það er mikið ónæði og hávaði, en líka ógnanir og rúðubrot. Það hefur verið margkvartað yfir ástandinu til Félagsbústaða sem gera ekkert í því og eru hættir að svara fyrirspurnum um þetta. Félagsbústaðir ættu að geta tekið á þessu með einhverjum ráðum.“

Fréttir hafa verið birtar á undanförnum mánuðum um útburð leigjenda úr íbúðum Félagsbústaða sem ekki hafa staðið í skilum með leigu. Faðirinn veltir því hins vegar fyrir sér hvort leigjendur Félagsbústaða geti hagað sér að vild svo lengi sem þeir greiða leigu.

Hann undrast mjög að sprautudallurinn hafi verið settur upp. „Þetta er prófessjónal atriði til að ganga frá sprautunálum. Ég veit að teymi frá Reykjavíkurborg hefur verið að vinna með þennan einstakling, sem er mjög veikur, það verður bara að segjast eins og er, en ég trúi því varla að þetta hafi verið sett upp frá þeim. Það væri rosalegt,“ segir maðurinn sem telur að skaðaminnkunarúrræði eigi ekki heima innan um bústaði fjölskyldufólks.

Hann kallar eftir því að Félagsbústaðir bregðist betur við kvörtunum undan ófriðsömum leigjendum í blokkinni við Írabakka.

Athugasemd: Í eldri útgáfu fréttarinnar segir að dallurinn undir sprautunálar sé merktur Geislavörnum ríkisins. Þetta er ekki rétt og er beðist velvirðingar á þessu.