Aflraunamaðurinn Njáll Torfason, sem vakti gríðarlega athygli á sínum tíma, er látinn 75 ára að aldri. Njáll lést á Maspalomas á Kanaríeyjum þann 1. apríl síðastliðinn. Greint er frá andláti hans í Morgunblaðinu í dag.

Njáll starfaði meðal annars við sjómennsku, heilari og nuddari auk þess að reka hótel og söluskála í Breiðdalsvík ásamt konu sinni.

Þekktastur var hann fyrir ýmsar aflraunir og segir í umfjöllun Morgunblaðsins að hann hafi slegið nokkur Íslandsmet. Hann keppti erlendis og kom fram á sýningum.

Njáll gat til dæmis dregið bíla og rútu með löngutöng, losað sig úr fjötrum og gengið berfættur á glóðum og glerbrotum. Þá gat hann fest á sig hluti með hugarorkunni. Í frétt Morgunblaðsins er einnig rifjað upp að hann reif í sundur tíu símaskrár á 16 sekúndum.

Þá er þess getið að hann hafi starfað í Sálarrannsóknarfélagi Íslands og tók að sér að reka óvætti úr húsum. Hann kallaði sig ekki miðil en sagðist þó vera skyggn.

DV fjallaði ítarlega um Njál í Tímavélinni árið 2020 en hægt er að lesa umfjöllunina hér að neðan.

Tímavélin: Íslendingurinn sem festi á sig hluti með hugarorkunni