Lögregluembætti á landinu, svo sem á Norðurlandi eystra og Austurlandi, hafa nýlega varað við svikapóstum sem ganga um internetið. Sérstaklega er varað við aðilum sem bjóðast til þess að aðstoða fólk í gegnum svokallað „screen-sharing.“
„Lögreglan varar við ítrekuðum tilraunum til ýmis konar fjársvika,“ segir í tilkynningu Lögreglunnar á Norðurlandi eystra.
Bent er á að talsvert sé um svikapósta til bæði einstaklinga og fyrirtækja þessi misserin. Einnig símtöl frá símanúmerum sem líta jafn vel út fyrir að vera íslensk og eru skráð á íslenska aðila en reynast svo vera frá glæpamönnum. Varar lögreglan við gylliboðum frá slíkum aðilum.
„Ef það hljómar of gott til að vera satt þá er það líklegast ekki satt,“ segir í tilkynningu lögreglu.
Sem dæmi er nefnt að fólki sé talið trú um að það eigi fjármuni á lokuðum reikningum, til dæmis í svokölluðu „lokuðu veski“ á rafmyntareikningi. Fólki er sagt að það þurfi að millifæra smá upphæð til að losa fjármagnið, sem sé vitaskuld ekki til. Þannig komast netglæpamennirnir yfir kortaupplýsingar viðkomandi.
Einnig er sérstaklega varað við svokölluðu „screen-sharing.“ Það er að þegar fólki er boðin „aðstoð“ með því að setja upp búnað sem hleypi honum inn á tölvuna. Það er að hann geti þá séð tölvu fórnarlambsins og komist yfir upplýsingar þar, svo sem aðgang að tölvupósti, heimabanka og fleiru. Mikið tjón geti hlotist af þessu.
„Ekki er allt gull sem glóir sagði einhvers staðar og ef lofað er skjótum gróða er rétt að staldra við og hugsa málið áður en fjármunir eru sendir inn á „reikninga“ erlendis, þeir fjármunir eru þá horfnir um leið og færslan hefur verið framkvæmd,“ segir í tilkynningu frá Lögreglunni á Austurlandi. „Tölvupóstar og skilaboð eru oft á tíðum send í nafni íslenskra stofnana og fyrirtækja sem virka trúverðug en þegar betur er skoðað sést t.d. netfang sem passar ekki við viðkomandi.“
