Markmið frumvarpsins voru að rýmka þau skilyrði sem þarf til að reka leigubíl. Nokkuð hefur verið rætt um stöðu mála á íslenskum leigubílamarkaði að undanförnu, meðal annars í tengslum við erlendan leigubílstjóra sem á dögunum var sakfelldur fyrir nauðgun.
Þá vakti athygli þegar greint var frá því hjá RÚV að kaffistofa leigubílstjóra á Keflavíkurflugvelli væri nú notuð sem bænahús af erlendum leigubílstjórum.
Í tilefni af seinni fréttinni rifjar Arnar Þór upp varnaðarorð sín sem hann sagði í ræðu á Alþingi skömmu áður en lögin voru samþykkt.
„Virðulegi forseti. Það er engin dyggð í því fyrir löggjafarþing að buna út lögum að nauðsynjalausu og mér sýnist að það sé einmitt að gerast hér. Verið er að setja hér lög með hálfum huga því að þingið er nýbúið að samþykkja hér áðan að hefja skuli endurskoðun þessara laga eigi síðar en 1. janúar 2025.
James Madison var fjórði forseti Bandaríkjanna. Hann var einn af þeim sem komu að samningu stjórnarskrár Bandaríkjanna sem hefur verið höfð að fyrirmynd vestrænna stjórnarskráa síðan. Hann varaði við því að löggjafarþing voguðu sér að reyna að drekkja almenningi í því sem hann kallaði pappírsstormi. Hér er verið að setja lög um heila stétt að því er mér virðist án nokkurra skýrra forsendna. Það gildir nú bara hið fornkveðna að betri er krókur en kelda. Ég vara við því að þetta sé gert og segi nei.”
Þá birtir hann tíst sem Áslaug Arna Sigurbjörnsdóttir, þáverandi ráðherra háskólamála, birti eftir að lögin voru samþykkt.
Arnar Þór segir að tístið hafi ekki elst sérlega vel, enda hafi verið fyrirsjáanlegt að með breytingum á lögum um leigubíla hafi verið að tefla margvíslegum hagsmunum í hættu að óþörfu. Tekur hann svo fram að hann og Birgir Þórarinsson hafi verið einu þingmenn Sjálfstæðisflokksins sem lögðust gegn frumvarpinu.
Hann rifjar svo upp það sem gerðist eftir atkvæðagreiðsluna:
„Í tilefni af þeirri sorglegu stöðu sem upp er komin er engin ástæða til annars en að segja frá frá því hér að eftir atkvæðagreiðsluna héldu stjórnarliðar lauflétta samkomu í skrifstofum þingsins handan við Austurvöllinn. Þar átti ég góð samtöl við viti borið fólk úr öðrum flokkum, m.a. Lilju Alfreðsdóttur úr Framsókn og Bjarna Jónsson úr VG, en á heimleiðinni rann upp fyrir mér að enginn þingmaður XD hafði talað við mig allt kvöldið, fyrir utan auðvitað Birgi Þórarinsson. Og þannig, góðir Íslendingar, virkar þetta í framkvæmd: Ef þú kýst ekki eftir flokkslínunni – jafnvel þótt frumvörpin séu glórulaus og heimskuleg – þá ertu ekki með í partýinu. Stjórnarskrárákvæði 48. gr. um að þingmenn séu „eingöngu bundnir við sannfæringu sína“ er þannig vanvirt í framkvæmd þar sem flokksræði yfirtrompar þingræðið.
E.S. Eftir þessa atkvæðagreiðslu var ég aldrei aftur kallaður inn sem varaþingmaður hjá XD, því menn sem vilja fylgja sannfæringu sinni eru illa þokkaðir af í stjórnkerfi sem lýtur flokksræði.”
Ath. Í fyrri útgáfu fréttarinnar var sagt að Áslaug Arna Sigurbjörnsdóttir hefði verið flutningsmaður frumvarpsins. Það er rangt og beðist er velvirðingar á missögninni.
