Lokað verður alfarið fyrir aðgang almennings að höfninni í þorpinu Höfnum, sem er hluti af Reykjanesbæ, en höfnin varð fyrir svo miklum skemmdum í illviðri og sjógangi í byrjun mánaðarins að það er ekki talið óhætt að leyfa lengur óheftan aðgang að henni. Svo illa er höfnin farin að ekki verður ráðist í viðgerðir.

Í fundargerð fundar atvinnu- og hafnaráðs Reykjanesbæjar, sem fram fór í gær, kemur fram að hafnarmannvirkin í Höfnum hafi í áhlaupsveðri helgina 1.-2. mars síðastliðinn orðið fyrir miklum skemmdum sem geri hafnarsvæðið hættulegt yfirferðar. Farið hafi verið yfir tillögur á fundinum um aðgerðir sem hefti almennt aðgengi að hafnarsvæðinu til að tryggja þar öryggi og varna slysum. Var sviðsstjóra atvinnu- og hafnarsviðs bæjarins falið að fylgja málinu eftir.

Með fundargerðinni fylgja myndir sem sýna vel þær miklu skemmdir sem urðu á höfninni en þær má nálgast hér en á myndunum má sjá meðal annars stór göt á þekju hafnarinnar.

Höfnin hafði í nóvember 2024, með nýrri reglugerð, verið formlega lögð af sem höfn en notkun á henni hefur verið lítil síðustu áratugi.

Skolað undan

Í umfjöllun Víkurfrétta kemur fram að jarðveg hefur skolað undan bryggjugólfinu að hluta og á þeim kafla séu einnig göt í þekjunni. Þá sé stórt stykki farið úr bryggjunni utarlega og þekjan einnig mikið skemmd og götótt. Fram kemur að auk þess að loka fyrir aðgengi að höfninni verði þekjan rofin á þeim 30 metra kafla þar sem jarðvegurinn er farinn undan henni.

Eins og áður segir hefur höfnin í Höfnum verið formlega aflögð sem höfn en hún hefur verið lítið notuð undanfarna áratugi og töluvert er síðan að bátar voru gerðir út frá þorpinu.

Í umfjöllun Víkurfrétta kemur fram að nokkuð hafi verið um að fólk hafi veitt af stöng frá bryggjunni en einnig hafi sést til manna leggja út krabbagildrur við höfnina.